CCXLIII.

1358, Juli 31. Ottmachau.

Ritter Jaracz von Pogrel und der Hauptmann des Neisser Landes, Hanko Voyt, vertragen die Klosterbrüder mit den Gebrüdern von Danielwitz.

Wir Jaracz von Pogrel rittir und Hanko Voyt houptmann in dem lande czur Nise bekennyn offinlich allen den, dy disin kegenwortigin brif seen adir horin lesen, daz wir beide mit enandir als teidinger mit hulfe des erwirdigin vatirs in gote, hern Preczlawis bisschovis czu Breczlaw unsers lieben vnd gnedigin herrin, vor dem ouch di selbe teiding geschen ist czwoschin den erbern geistlichen lueten vnd herrin, dem . . abte vnd convente des clostirs czu Camencz an eynem teil, und Luthern, Dirskin vnd Bernhard gebruedir von Danielowicz von erin vnd andir alle erin bruedern weyne, an dem andirn teile, gegangin vnd geerbeit haben, vnd habin sie beidirsit fruntlich entscheidin und vorrichtit in der weize, daz dy egenantin brudir adir irre keiner sol vorwert me in keiner weise an sprechin adir beschuldigin vm keyn gut, erbe adir dink, is sei, wy is genant sei, den egenanten apt, covent (!), clostir adir keynen monch des selbin clostirs, nu vnd ummirmee. Ouch sullin sie erim brif gebin dem obgenanten apte vnd covent vnd sullin sich ebeclich vorczeigin allis rechtis adir zachin, dy sie habin adir gehabin moechtin wedir den selbin apt, covent adir clostir. Vnd daz selbe sullin se globen in guten truwen an arglist vor sich selber, vor alle andirn ire brudir, vor ire nochkomelinge adir andir irre brudir noch­komelinge, vnd ouch ab vorwert in cziten andir irre brudir adir ere nochkomelinge adir frunt den egenanten apt, covent adir clostir vm sulche zachin, dy czwoschin en ist gewant gewest in keiner weise anlangetin adir ansprechen, daz sullin ouch die egenantin gebrudir Luthir, Dirsko vnd Bernhard an arglist entwerrin vnd sie do von brengin an allin schadin. Czu eynem geczugnisse disir dinge hab wir vnsir beidir ingesigil an disin brif losin hengin. Geschen vud gegeben czu Othmuchow uf dem house an dem neesten dinstage noch sancte Jacobis tag des apostiln noch gotis geburt tusint drihundert iar in dem acht vnd fumczigistin iare.

Or. Perg. Das S. des Jaracz von Pogrel ist von dem Pergamentstreifen losgerissen und fehlt; das des Hanko Voyt an einem Pergamentstreifen ist wohl erhalten (Helm mit einem vierendigen Hirschgeweih, Umschrift: † S. IOHANNIS VOYT.).

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.